Sa ika-11 Black Friday Protest ng 2026

SA IKA-11 BLACK FRIDAY PROTEST NG 2026

kay-init ng kanilang mga talumpati

laban sa imperyalismo at naghahari

dahil sa digmaan, nagtaasan ang presyo

ng pangunahing bilihin tulad ng krudo

di lang simpleng "Ikulong ang mga kurakot!"

kundi "Itigil ang panggigera ng buktot!"

sa ngalan ng imperyo ay nais manakop

ng Estados Unidos, bansa'y nilulusob

inuna nilang sakupin ang Venezuela

nais nilang isunod ang Greenland at Cuba

ngayon ay dinigma naman nila ang Iran

tumindi ang labanan sa Gitnang Silangan

malayo tayo, malayo ang Pilipinas

ngunit apektado tayo sa pandarahas

ng imperyalistang bansang nais maghari

sa mundo, dapat imoeryalismo'y mapawi

kapayapaan para sa buong daigdig

magkaisa nang imperyalismo'y madaig

labanan natin ang pandarahas ng impe

makataong sistema'y dapat ipagwagi

- gregoriovbituinjr.

03.13.2026 (Friday the 13th)

Ang sistemang baluktot ng buwayang kurakot - tanaga-baybayin

ang sistemang baluktot

ng buwayang kurakot

ay dapat nang malagot

at sila'y mapanagot

- gbj/03.13.2026

tanaga-baybayin

Awit laban sa kurakot

‎AWIT LABAN SA KURAKOT

‎

‎ang sistemang baluktot

‎ng buwayang kurakot 

‎ay dapat nang malagot

‎at sila'y mapanagot

‎

‎- gregoriovbituinjr.

‎03.13.2026 (Friday the 13th)

‎11th Black Friday Protest ng 2026

* mapapanood ang bidyo sa kawing na: https://www.facebook.com/share/v/1GzdckvL67/ 

Tulawit

TULAWIT

‎

‎itutulâ ko muna

‎saka ko aawitin

‎mga isyu ng masa

‎yaong gigitarahin

‎

‎ang mga kaapihang

‎dinaranas ng dukhâ

‎bibigyang kasagutan

‎ng nagkaisang madlâ

‎

‎- gregoriovbituinjr.

‎03.13.2026 (Friday the 13th)

Rebolusyonaryo tulad ni Bonifacio - tanaga baybayin

isang rebolusyonaryo

tulad ni Bonifacio

ganyan kung ituring ko

ang yakap na prinsipyo

- gbj/03.13.2026

tanaga-baybayin

Mga buwayang walang buntot

MGA BUWAYANG WALANG BUNTOT

‎

‎mapanlinlang at mapag-imbot

‎iyang mga trapong kurakot

‎sila'y buwayang walang buntot

‎na sa masa'y hirap ang dulot

‎

‎panagutin ang mga buktot

‎sa sistema nilang baluktot

‎panagutin lahat ng sangkot

‎sa ginawang pangungurakot

‎

‎- gregoriovbituinjr.

‎03.12.2026

* litrato mula sa google

Awit sa bulalakaw

AWIT SA BULALAKAW

‎

‎nagising ng madaling araw

‎nang makita ang bulalakaw 

‎animo'y mapulang balaraw

‎yaong sa langit ay lumitaw

‎

‎- gregoriovbituinjr.

‎03.12.2026

* mapapanood ang bidyo sa kawing na:

https://www.facebook.com/share/v/1CNohb3f9J/ 

Silent - Listen; Silence - License

SILENT - LISTEN; SILENCE - LICENSE

‎

‎pag nirambol ang titik ng isang salitâ

‎ay may mabubuo kang iba pang katagâ

‎ang SILENT ay LISTEN, makinig nang tahimik

‎at ang napakinggan ay maisasatitik

‎

‎ang SILENCE ay LICENSE, tahimik magmaneho

‎may lisensya, pag nahuli'y maaayos mo

‎tingni ang salitang pag nirambol, THREE is THERE

‎if you WON, you OWN it NOW, pati ERA, ARE, EAR

‎

‎paano mo ma-COMPILE ang mga POLEMIC

‎paano i-DRAW ang WARD na talagang siksik

‎paano mo i-SHOUT sa SOUTH, hindi THORN ang NORTH

‎dapat sa TOPS ng POTS, STOP ang POST sa SPOT

‎

‎sabi ko nga, COULD CLOUD HATE the HEAT, isang tanong

‎ilang PIECES ang SPECIE, isa pang tanong

‎minsan nga'y nakakapagod din ang ganito

‎mabuti pa kayâ, maglaro na lang tayo

‎

‎- gregoriovbituinjr.

‎03.12.2026

‎

‎* mga litrato mulâ sa larong Word Connect sa selpon

Awit sa sinta

‎AWIT SA SINTA

‎

‎ang pagmamahal ko'y hanggang langit

‎ikaw lang ang pinakaiibig

‎alaala't larawan mo'y bitbit

‎sa aking pusò, diwà at bisig

‎

‎- gregoriovbituinjr.

‎03.11.2026 

‎(9th death monthsary ni misis)

* mapapanood ang munting bidyo sa kawing na: https://fb.watch/FNaYFCCEhc/ 

May suloy na ang tanim kong sibuyas

MAY SULOY NA ANG TANIM KONG SIBUYAS

‎

‎ginayat ko ang ilalim ng sibuyas

‎at inilagay sa ibabaw ng tubig

‎sa lagayan ng mineral water, baka

‎makapagpatubo ng sibuyas

‎

‎ilang araw o isang linggo'y lumipas

‎nagkasuloy na ang tanim kong sibuyas

‎ay, kaysarap ulamin ng talbos nito

‎sabi nila, ito raw ay pampalakas

‎

‎sana'y makapagpatubo ng marami

‎alagaan sa dilig itong itinanim

‎ang tagalungsod ay nagsasaka na rin

‎tiyagain ko lang at ito'y dadami

‎

‎kailangan ngayon ay magtanim-tanim

‎upang di magutom at may aanihin

‎

‎- gregoriovbituinjr.

‎03.11.2026

Pabalat ng aklat kong dinisenyo ni misis

PABALAT NG AKLAT KONG DINISENYO NI MISIS

‎

‎kung ikumpara sa tatlo kong huling libreto

‎kayganda ng disenyo ni misis sa aklat ko

‎tingni ang pabalat ng pangkalikasang libro

‎sadyang kakaiba kumpara sa disenyo ko

‎

‎sayang, walâ na siya, wala na yaring sinta

‎sana, iba kong libreto'y dinisenyo niya

‎pagkat talagang ubos nang ito'y ibinenta

‎sa mga makakalikasang grupo at masa

‎

‎kayâ sa daigdigang araw ng kalikasan

‎sa Abril Bente Dos kada taon, Earth Day iyan

‎dapat muling ilimbag ang libro kong naturan

‎at bigyan ng kopya ang iba't ibang aklatan

‎

‎nais kong ang kanyang disenyo'y maging imortal

‎at siya'y maalala sa panahong matagal

‎salamat sa kaygandang disenyo, aking mahal

‎pagka disenyo mong likhâ sa akin ay banal

‎

‎- gregoriovbituinjr.

03.11.2026 (9th death monthsary ni misis)

Sa ika-9 na death monthsary ni misis

SA IKA-9 NA DEATH MONTHSARY NI MISIS

‎

‎siyam na buwan na pala ang nakalipas

‎kaybilis ng panahon, pag-ibig kong wagas

‎para bang kailan lang, kausap lang kita

‎ngunit ngayon, ikaw na'y nasa alaala

‎

‎dalawampu't walong doktor, nasa talaan

‎at silang sumuri sa iyong karamdaman

‎ngunit wala silang nagawâ, walâ, walâ!

‎hanggang kunin ka na sa amin ni Bathalà

‎

‎nasa gunitâ ko lagi ang iyong ngiti

‎at inspirasyon kita sa bawat kong mithi

‎tulâ man o pagkathâ ng kwento't nobela

‎o kaya'y pagtipâ sa bagting ng gitara

‎

‎O, aking diwatà, magkikita rin tayo

‎ilang taon pa, at ako na'y nasa dulo

‎ng tulay na tahak kong pagkahabà-habà

‎habang dala ko'y mga nagawâ kong akdâ

‎

‎- gregoriovbituinjr.

‎03.11.2026

Payò sa panaginip

PAYÒ SA PANAGINIP

kagabi'y napanaginipan ka

payo'y gamitin ko ang gitara

aking mga tula'y gawin kong kanta

bakasakaling dito magkapera

batid mong walang salapi sa tulâ

kahit tambak-tambak ang aking kathâ

salamat sa payo, sintang diwatà

tumutulong kahit ikaw na'y walâ

salamat sa gitara mong binili

at sa akin, ito'y magkakasilbi

aawitin yaong tinig ng api

lalo't sa bayan alay na'y sarili

salamat, sinta ko, sa iyong payò

bagamat yaring puso'y nagdurugô

- gregoriovbituinjr.

03.10.2026

Awit sa tanaga baybayin

‎AWIT SA TANAGA BAYBAYIN

‎

‎tanaga baybayin

‎aking aawitin

‎sariling sulatin

‎ng ninunô natin

‎

‎tiyagain lamang

‎ang paggigitara

‎makakalikhâ rin

‎ng sariling kanta

‎

‎- gregoriovbituinjr.

‎03.10.2026

* mapapanood ang bidyo sa kawing na: https://www.facebook.com/share/v/1D5ZMrpda5/         

Ikasampu, ika-10

‎IKASAMPU, IKA-10

‎

‎walang gitling ang ikasampu

‎iyan ang wasto pag nagdugtong

‎ang panlapi't salitang ugat

‎balarila'y alam mo dapat

‎

‎may gitling na pag ika-10

‎iyan ang wastong pagdurugtong

‎ng panlapi at ng numero

‎balarila'y batid mo dapat

‎

‎ikasampu ngayon ng Marso

‎ika-10 ngayon ng Marso

‎pansinin mo ang gamit nito

‎balarila'y tinurò ito

‎

‎meron ka sanang natutunan

‎sa abang makatâ ng bayan

‎túrong ito'y pakatandaan

‎nang wasto'y gamitin ng tanan

‎

‎- gregoriovbituinjr.

‎03.10.2026

‎

‎*litrato mulâ sa larong Word Connect sa selpon

"Happy Women's Day", ani tennis star Alex Eala

"HAPPY WOMEN'S DAY", ANI TENNIS STAR ALEX EALA

‎

talagang kayhusay / ni Alex Eala

‎‎noong si Coco Gauff / ay tinalo niya

mapagpakumbaba / ang ating atleta

nang magtalumpati'y / binati ang ina

‎

‎at iba pang ina, / sa kababaihan

‎nag-Happy Women's Day, / sadyang kainaman

‎inspirasyon siya / ngayon nitong bayan

‎nang dahil sa mga / napagtagumpayan

‎

‎kaya taas-noo / akong nagpupugay

‎kay Alex Eala, / inspirasyong tunay

‎bagong sports hero / ang atletang Pinay

‎mabuhay ka, Alex! / mabuhay! mabuhay!

‎

‎ksysarap marahil / maglaro ng tennis

‎sa palo ng bola'y / di dapat magmintis

‎dapat araw-araw / talagang magpraktis

raketa't pagpalo'y / gamaying mabilis

‎

‎- gregoriovbituinjr.

‎03.10.2026

‎

‎* litrato mulâ sa ABS-CBN News sa fb

Kaharapin ma'y kahirapan

KAHARAPIN MA'Y KAHIRAPAN

‎

‎tibak akong naninindigan

‎para sa pag-unlad ng bayan

‎ngunit di para sa iilan

‎kundi para sa panlahatan

‎

‎kaytagal kong pinagnilayan

‎ang prinsipyo't pasya kong iyan

‎sama-samang kilos ng tanan

‎sama-sama ang taumbayan

‎

‎wakasan na nating tuluyan

‎ang kabulukan ng lipunan

‎iyan ang prinsipyo kong tangan

‎kaharapin ma'y kahirapan

‎

‎dapat ay walang naiiwan

‎may panlipunang katarungan

‎ginagalang ang karapatan

‎itayo'y patas na lipunan

‎

‎wakasan na ang kurakutan

‎pati dinastiya't gahaman

‎paunlarin natin ang bayan

‎panlahat, di para sa ilan

‎

‎- gregoriovbituinjr.

‎03.10.2026    

11 titik na sagot sa krosword

‎11 TITIK NA SAGOT SA KROSWORD

‎

‎nakatutuwâ minsan ang palaisipan

‎pag mga salita'y nagsanga-sangandaan

‎Pahalang: KAHALAGAHAN, KASALUKUYAN

‎Pababa: KALIGAYAHAN, KATAGALUGAN

‎

‎ang krosword ay di lamang pampalipas-oras

‎kundi isipan natin ay pinatatalas

‎kumbaga ito'y ehersisyong pampalakas

‎ng utak, kung sa pagkain ay panghimagas 

‎

‎bagamat "ka" ang unang pantig ng salitâ

‎at "an" naman ang sa dulong salitâ, tugmâ

‎wastong panlaping gamit sa mga katagâ

‎karaniwan sa ating katutubong wika

‎

‎sumasagot ng krosword sa araw at gabi

‎ang makatang sa sambayanan nagsisilbi

‎

‎- gregoriovbituinjr.

‎03.09.2026

‎

‎* krosword mulâ sa pahayagang Abante Tonite, 01.06.2026, p7    

Bunga, bungi, bungô

‎BUNGA, BUNGI, BUNGÔ

‎

‎iba't ibang patinig

‎sa dulo ng salitâ

‎palaisipang ibig

‎kong masagutang sadyâ

‎

‎ano kayâ ang sagot?

‎BUNGA, BUNGI, o BUNGÔ?

‎ano ang bungang dulot?

‎nabungi o nagdugô?

‎

‎krosword pag sinagutan

‎ay dapat mong alamin

‎ang Pababa't Pahalang

‎nang tamang sagot kamtin

‎

‎ganyan lang, katoto ko

‎at masasagutan mo

‎

‎- gregoriovbituinjr.

‎03.09.2026

Balakin ng makatang taring

BALAKIN NG MAKATANG TARING

‎

‎isang nobela ng pag-ibig

‎at araw-araw na pagtulâ

‎mga adhikang nakasandig

‎sa kalooban, puso't diwà

‎

‎napakapayak na pangarap

‎na ninanais kong maabot

‎kahit gaano pa kahirap

‎danasin ma'y kayraming gusot

‎

‎kwento ng masa'y susulatin

‎hanggang maging nobela ito

‎tulâ sa dukha'y kakathain

‎na araw-gabi'y gawain ko

‎

‎patuloy akong magpapawis

‎kaharapin ma'y kahirapan

‎sa kabilâ ng dusa't amis

‎ito'y mapagtatagumpayan

‎

‎- gregoriovbituinjr.

‎03.09.2026

‎

‎* mga litrato mula sa larong Word Connect sa selpon