Gawaing tambak

GAWAING TAMBAK

tumatambak ang mga gawain

na dapat lang piliting tapusin

subalit dapat alam mong tupdin

ang katungkulan kahit tipirin

inilagay ka diyan ng bayan

sa sinumpaan mong katungkulan

kaya pagbutihin ang paggampan

ang sa kalooban mo'y magaan

lalo't adhikain at pangarap

ay lipunang walang pagpapanggap

na taumbaya'y di naghihirap

lipunang sa kapwa'y mapaglingap

ang pagkasalansan ng trabaho

at time management nama'y batid mo

kung sa trabaho mo'y aburido

ay huwag mo lang ikapanlumo

gawaing tambak, dapat matapos

napunong salop, dapat makalos

hininga nawa'y di manggipuspos

ikaw pa rin ay makararaos

- gregoriovbituinjr.

02.21.2022

* litratong kuha ng makatang gala sa isang pader sa Katipunan, QC

Sa paghamok

SA PAGHAMOK

tahimik sa bawat pangungutya

ang mapagtiis na maglulupa

sa problema'y di na makahuma

anuman ang gawing paghahanda

nanunumbat ang sariling budhi

pag di tinama ang maling gawi

ah, ayaw na niyang manatili

ang kahirapang nakamumuhi

di pa nagagawa ang marapat

bagamat sa prinsipyo'y namulat

di makangiti, di makadilat

pag harap-harapang inaalat

magpapatuloy ang paghahamok

laban sa hunyango't trapong bugok

papalitan ang sistemang bulok

at ilagay ang dapat sa tuktok

ang bugtong ay malulutas pa rin

lalo't may talino ka ring angkin

na kabutihan ay panaigin

laban sa pang-aapi't salarin

- gregoriovbituinjr.

02.20.2022

World Day of Social Justice

02.20.2022

02.20.2022

World Day of Social Justice

mahalaga sa tao ang Hustisyang Panlipunan

lalo na't karapatang pantao'y niyuyurakan

di lamang sa biktima ang hangad na katarungan

kundi bawat pagpapasya'y dapat makatarungan

panawagan namin ngayong World Day of Social Justice

patuloy tayong makibaka, huwag magtitiis

sa kahirapang dinulot ng elitista't burgis

na mapagsamantalang sistema'y dapat mapalis

bakit may laksang dukha, bakit may ilang mayaman

lipunang ito'y para sa lahat, di sa iilan

sana lipunan ay makatao't makatarungan

iyan ay taas-kamao naming pinaglalaban

ang inaadhika ngayong World Day of Social Justice

ay makataong sistema, na di dapat Just-Tiis

ito ang sa puso't diwa ko'y prinsipyong malinis

panawagan itong sa madla sana'y magpabigkis

- gregoriovbituinjr. 

Sa kisame

SA KISAME

sa kisame napatitig

nang binti niya'y namitig

subalit di natigatig

sa paghuni ng kuliglig

madaling araw pa lamang

ngunit siya na'y nag-abang

ng pagputok ng liwanag

upang lihim ay mabunyag

ng naggapangang butiki

na naroong bumabati

sa makatang winawari

ang pangarap niya't mithi

tila di pa niya arok

sino kaya ang papatok

kung sa halalan kalahok

ang mga itlog na bugok

ah, tuloy lang sa layunin

kaya kumikilos pa rin

upang dalita'y hanguin

sa hirap na anong talim

di sasapat ang kataga

upang kathain ang tula

kahit tatlong metrong haba

ang kanyang pagkatulala

- gregoriovbituinjr.

02.20.2022

Sa hagdanan

SA HAGDANAN

naroon lang ako sa hagdanan

kung saan ko pinagninilayan

ang samutsaring isyu ng bayan

at kalagayan ng kalikasan

lalo't isa akong aktibista

na lagi nang laman ng kalsada

lipunang makatao ang nasa

kaya naritong nakikibaka

at patuloy akong kumikilos

upang ating baguhin ng lubos

ang kalagayang kalunos-lunos

ng masang api't binubusabos

niyakap ang simpleng pamumuhay

puspusang nakikibakang tunay

sa hagdanan ding iyon nanilay

anong mga dahilan ko't pakay

linisin ang lipunang mabaho

labanan ang burgesyang hunyango

tangan ang prinsipyo'y pinangako

lipunang makatao'y itayo

- gregoriovbituinjr.

02.19.2022

Sa abangan ng dyip

SA ABANGAN NG DYIP

anong init yaong paglalakad

sa tanghaling tapat nakababad

sa banas, buti't di naghuhubad

subalit ano nang nakalahad

sa abangan ng dyip ay papara

tumigil muna't aking nabasa

ang nakasulat sa karatula

na talaga namang kakaiba

sapagkat doon ay may dinugtong

na ibang iba ang nilalayon

paano kaya makakabangon

kung karne'y titigilang malamon

kayganda niyon pag naunawa

tugon daw iyon sa klima't sigwa

tulong sa kalikasan at bansa

aba'y anong gandang halimbawa

may kalaliman kung intindihin

ngunit esensya'y ating kapain

na may iba tayong iisipin

na kalikasa'y alagaan din

tigilan ang pagkain ng laman

ng hayop at maging vegetarian

gulay at isda'y sapat din naman

upang mapalakas ang katawan

- gregoriovbituinjr.

02.19.2022

Luntiang lungsod

LUNTIANG LUNGSOD

asam ko'y luntiang kalunsuran

mapuno at masarap tirahan

may maayos na kapaligiran

maraming tanim ang kalikasan

kulay-lunti ang buong paligid

payapa ang kasama't kapatid

walang sa dilim ay binubulid

kapanatagan sa diwa'y hatid

mamamayan doo'y mahinahon

ang mga batas ay naaayon

hanging kaysarap, walang polusyon

basura'y sa tama tinatapon

lunti't walang pagsasamantala

ng tao sa tao, anong ganda

ng buhay ng mga magsasaka,

ng dukha't obrero, at iba pa

sa ganyang lungsod, sinong aayaw

kung di maalinsangaw ang araw

kung payapang mamuhay, gumalaw

kung paligid, malinis, malinaw

lipunang lunti at makatao

na ipinaglalabang totoo

sana'y makatahan sa ganito

sa lungsod na pinapangarap ko

- gregoriovbituinjr.

02.19.2022

Sa araw ng Hustisyang Panlipunan

SA ARAW NG HUSTISYANG PANLIPUNAN

World Day of Social Justice ang a-bente ng Pebrero

marapat lang alalahanin ang araw na ito

tulad ng isa pang mahalagang araw sa mundo:

ang Daigdigang Araw ng Karapatang Pantao

lalo't marami nang inhustisya ang nagaganap

na ang mga biktima'y pawang mga mahihirap

tulad ng pagtakbo ng mga trapong mapagpanggap

at tulad sa pagpaslang sa dukha sa isang iglap

nahan ang hustisya, sa araw na ito'y itanong

bakit mga inosente'y nilagay sa kabaong

bakit sa pagpaslang, tuwang-tuwa ang mga buhong

mga ina'y nagsiluha, humihingi ng tulong

"ang hustisya ay para lang sa mayaman," kainis

isa man itong katotohanang walang kaparis

alalahanin natin ang World Day of Social Justice

hustisya'y dapat kamtin, di ito dapat Just-TIIS

- gregoriovbituinjr.

02.18.2022

Bakit bawal magkasakit?

BAKIT BAWAL MAGKASAKIT?

pag may sakit ka'y di na papansinin

lalayuan ka na lang nilang kusa

tila ba wala ka nang kayang gawin

kundi sa maghapon ay tumunganga

tingin na sa iyo'y namamalimos

ng awa upang makabiling gamot

at batid nilang wala kang panggastos

di ka na pansin, ikaw na'y nalimot

iyan ang masaklap na sasapitin

ng tulad kong may sakit sa kabila

ng katapatan mo sa adhikain

na sadyang tagos sa puso mo't diwa

maliban kung may hawak kang tungkulin

nagagampanan ang misyong dakila

ah, subalit kung pabigat ka lang din

turing sa iyo'y wala ka na, wala

nabuhay na puno ng sakripisyo

ngunit sa gawain ay nagkasakit

nabuhay na niyakap ang prinsipyo

na sa puso't diwa mo'y nakaukit

may sakit ka na, walang pakinabang

ah, magpagaling ka na lang sa bahay

turing sa iyo'y pabigat ka na lang

marami kang kapalit, mas mahusay

tulad ka ng T.V. o radyong sira

di ka aayusin, papalitan ka

para ka nang kagamitang naluma

di na aayusin, papalitan na

kaya sa atin, bawal magkasakit

kaya dapat manatiling malusog

ang katawan ay alagaang pilit

at sa trabaho'y huwag pabubugbog

kung may magmalasakit, ay, mabuti

may kasangga kang nagpapahalaga

ngunit huwag kang basta mawiwili

pagkat bihira lang ang tulad niya

- gregoriovbituinjr.

02.18.2022

Pagninilay

PAGNINILAY

nakatitig muli sa kawalan

at pulos pagninilay na naman

sana'y di mapunta sa kangkungan

ang ginagawa para sa bayan

patuloy na itinataguyod

ang pangarap ng mananaludtod

isang lipunang kalugod-lugod

para sa dalita't kumakayod

tunay na lipunang makatao

na iginagalang ang proseso

walang pagpaslang doon o dito

karapatan ay nirerespeto

mayroong panlipunang hustisya

sa lahat ng namatayang ina

yaong maysala'y makulong sana

para sa kapakanan ng masa

sa mga nagtatanim ng palay,

puno, bakawan, o kaya'y gulay

tamang subsidyo yaong ibigay

upang may dignidad na mabuhay

lipunang makatao'y itayo

at karahasan ay mapaglaho

paggagalangan ang tinutungo

kaya prinsipyo'y di isusuko

- gregoriovbituinjr.

02.18.2022

Bawal umihi dito

BAWAL UMIHI DITO

"Bawal umihi dito!"

ayon sa karatula

multa'y sanlibong piso

baka matulala ka

kung ikaw ay maysakit

dapat alam kung saan

iihi lalo't sirit

sa pantalon na naman

pader kasi'y papalot

o sa ihi papanghi

kaya di tinutulot

na sa pader umihi

kung di mo na matiis

sasabog na ang pantog

umihi ng mabilis

kung mahuli ka'y durog

huwag ka lang pahuli

lalo't salbaheng mama

pag-ihi'y di na libre

sa multa'y matulala

- gregoriovbituinjr.

02.17.2022

Ang maging tinig

ANG MAGING TINIG

"The least I can do is speak out for those who cannot speak for themselves." ~ ayon sa pabalat ng isang kwadernong ginagamit ko

anong ganda ng tinuran sa isa kong kwaderno

binili ko iyon dahil sa pabalat, tanda ko

kaylapot ng paninindigan, kaygandang prinsipyo

tinig niya'y para sa walang tinig sa bayan ko

parang ako, isang sagad-sagaring aktibista

sa mahabang panahon ay naging boses ng masa

di sa Kongreso o Senado kundi sa kalsada

na sa mga rali'y pinagsasalitang talaga

pagkat tungkulin ko bilang sekretaryo heneral

ng ilang organisasyon, sa diwa ko'y nakintal

sa init man ng araw, patuloy sa pagpapagal

lalo't sa poder o pader, dukha'y di nakasandal

magpapatuloy akong isang mabangis na tinig

para sa mga dukha't api nang magkapitbisig

ipapakita ang marangal na prinsipyo't tindig

pagbabago man ng sistema'y lumabas sa bibig

isa itong pagtaya o commitment ko sa madla

ang maging tinig ng mga di makapagsalita

ang maging boses ng mga inapi't mahihina

ang kanilang isyu'y sasabihin o itutula

- gregoriovbituinjr.

02.17.2022

Labada

LABADA

nang makapananghali'y naglaba

nitong damit ng aking asawa

sa akin, wala namang problema

kung labada man ay sangkaterba

suot ni misis ang mga iyon

ng ilang araw hanggang kahapon

ako'y kuskos dito, kuskos doon

sinabay na damit ko't pantalon

hanggang nilabhan ko'y binanlawan

bago isampay ay pinigaan

aking hinanger ang karamihan

ang iba'y inipit sa sampayan

ganyan kami, tulungan sa bahay

ako'y maglalaba't magsasampay

sa pagkukusot, may naninilay

akin palang diwa'y naglalakbay

kung saan-saan nakakarating

tila baga ako'y nahihimbing

kaya maglaba'y kaysarap gawin

pagkat may tula nang kakathain

- gregoriovbituinjr.

02.17.2022

Ipanalo ang atin

IPANALO ANG ATIN

ipanalo ang atin

na lider na magaling

plataporma n'ya'y dinggin

namnamin at isipin

pinanday ng panahon

ang lider nating iyon

na tatanggal paglaon

sa kontraktwalisasyon

pakinggang magsalita

ang lider-manggagawa

na ang inaadhika

kabutihan ng madla

dala n'yang pagbabago'y

pangmasa, pang-obrero

na hangaring totoo'y

lipunang makatao

Ka Leody de Guzman

para sa panguluhan

ipanalo't ilaban

para sa sambayanan

- gregoriovbituinjr.

02.16.2022

Palaisipan

PALAISIPAN

palaisipan

aking aliwan

nagpapagaan

sa pakiramdam

tanong, alamin

iyong basahin

sagot, isipin

mabubuo rin

banoy, agila

sayaw, lambada

dilag, dalaga

misis, asawa

isda ay dilis

gulay, kamatis

tubigan, batis

kutis, makinis

may isang salot

kayhabang buntot

amoy maantot

lagim ang dulot

palaisipan

tayo'y maglibang

nakakagaan

ng pakiramdam

- gregoriovbituinjr.

02.16.2022

Lasbat nat dalis

LASBAT NAT DALIS

laspag nga ba ang dilis

nang ito'y humagibis

tumalon at nagburles

sa ilog na malinis

o malawak na batis

ayokong magmalabis

sa paggawa ng hugis

di man gayon katulis

ako pala'y mabilis

napasagot si misis

minsan paalis-alis

na maganda ang bihis

hanap ay mangga't atis

paborito ng buntis

na pagsinta'y kaytamis

problema'y napapalis

ulam ko man ay dilis

at sawsawan ay patis

sa pila man magtiis

ako'y lasbat nat dalis

- gregoriovbituinjr.

02.16.2022

Polusyon

POLUSYON

wala kami sa pusod ng gubat

kundi nasa lungsod na makalat

damang polusyon ay humabagat

na sa atin parang nanunumbat

buti't mapuno pa rin sa lungsod

kahit polusyon ay humahagod

sa ating hininga'y sumasakyod

patuloy man tayong kumakayod

ah, paano na kung walang puno

anong init na sa diwa't puso

na kaakibat nito'y siphayo

baka mawalan tayo ng tino

ang nararapat ay ating gawin

upang iyang polusyon sa hangin

ay tuluyang mapawi, tayo rin

ang kikilos, simulan na natin

- gregoriovbituinjr.

01.15.2022

Tungkulin para sa kinabukasan

TUNGKULIN PARA SA KINABUKASAN

patuloy nating pangalagaan ang kalikasan

na mahalagang tungkulin ng bawat mamamayan

sapagkat isa lang ang daigdig nating tahanan

kaya kinabukasan nito'y ating paglaanan

ang pangangalaga sa mundo'y huwag ipagkait

sa susunod na henerasyong mabuhay nang sulit

di tayo kailangan ng kalikasan subalit

kailangan natin ang kalikasan, aba'y bakit?

isa iyang katotohanang tumagos sa puso

ng mga katotong sa klima nga'y nasisiphayo

dahil sa climate change, maraming isla'y maglalaho

balintuna, tataas ang tubig, lupa'y natuyo

walang makain kahit nagtanim na magsasaka

lalo't tumindi ang bagyo't kayraming nasalanta

pagsunog ng fossil fuel at coal ay tigilan na

sagipin ang masa mula sa nagbabagong klima

halina't ating pangalagaan ang kalikasan

huwag gawing basurahan ang dagat at lansangan

kapitalismong sanhi nito'y dapat nang palitan

at magandang bukas para sa masa'y ipaglaban

- gregoriovbituinjr.

02.15.2022

Liberty

LIBERTY

ang puso ko'y lumulukso

kapag nakikita kita

O, tunay kang pag-ibig ko

rosas kitang anong pula

sa Araw ng mga Puso

nais kong makapiling ka

ikaw ang tanging kasuyo

at minumutyang talaga

sa iyo lang narahuyo

itong makata ng masa

hiling sana'y di maglaho

ang iwi nating pagsinta

Kalayaan o Liberty

o Freedom o Kasarinlan

tangi kitang binibini

ng puso't kinalulugdan

Liberty ng aking buhay

Kalayaan man ang asam

Freedom man ang aking pakay

Kasarinla'y makakamtan

Happy Valentine's Day sa'yo

mahal, iniibig kita

tandaang ako'y narito

lagi para sa'yo, sinta

- gregoriovbituinjr.

02.14.2022

Tanging handog

TANGING HANDOG

regalo ko kay misis ay halamang hugis-puso

tanging handog sa iniibig ko ng buong-buo

"Hoya" raw ang tawag dito sa tanim ng pagsuyo

na ididilig ko'y pagsinta nang lalong lumago

pagmamahal ay nadarama sa tangi kong mutya

kaya nagtutulungan kami ng aking diwata

anumang sigwa o suliranin man ang magbadya

magsisikap na tunay upang kamtin ang adhika

Araw ng mga Puso'y anibersaryo ng kasal

sa civil wedding sa Tanay, alaalang dumatal

pang-apat na anibersaryo, ganyan na katagal

kaya tanim na hugis-puso ang handog sa mahal

Maligayang Araw ng mga Puso, aking sinta

at magkasama nating nilulutas ang problema

at sa anibersaryo ng ating kasal, O, sinta

tanging masasabi'y magpatuloy tayo tuwina

upang hubugin ang asam nating kinabukasan

upang pagsinta'y manatili sa kasalukuyan

upang hinaharap ay atin ding mapaglaanan

upang magiging anak at apo'y mapaghandaan

- gregoriovbituinjr.

02.14.2022