Pagtitig sa kisame

PAGTITIG SA KISAME

at muli, nakatitig ako sa kisame
pinagnilayan ang nadinig na mensahe
bakit kayraming tiwali, trapo't salbahe
bakit ba api ang dukha, bata't babae

sa ganyang sistema, ayokong manahimik
anumang puna't nakita'y isasatitik
marami man silang sa isyu'y walang imik
habang masa'y parang bawang na dinidikdik

ano bang meron sa kisame kundi sapot
marahil ng gagamba o baka may surot
subalit ang lipunan ay tadtad ng sapot
ng mga tuso't tiwali, nakalulungkot

kayraming trapong nang-iisa, nanggigisa
ng mga dukhang sa kanila umaasa
akala sila'y mga diyos at diyosa
na kaligtasan ng bayan ay tangan nila

walang dapat mang-api o mambubusabos
walang isang tagapagligtas, manunubos
masa't uring manggagawa na'y magsikilos
nang sistemang bulok ay tuluyang matapos

- gregoriovbituinjr.
02.24.2024

* litrato ng kisame mula sa naganap na Labor Forum on ChaCha sa UP, Pebrero 22, 2024

Labinglimang patay sa nahulog na trak

LABINGLIMANG PATAY SA NAHULOG NA TRAK

"Umakyat na sa 15 ang bilang ng nasawi sa pagkahulog ng truck sa bangin sa Brgy. Bulwang, Mabinay, Negros Oriental nitong Miyerkules ng hapon."

"Patungo sila sa Brgy. Dawis sa Bayawan City mula sa bayan ng La Libertad at tinahak ang daan sa bayan ng Mabinay nang mahulog ang truck sa bangin sa kurbadang bahagi." 

"Sa inisyal na imbestigasyon, ayon na rin sa driver, nawalan siya ng kontrol nang mawalan ng preno ang truck kaya nag-overshoot ito."

"Sumirko ang truck matapos mahulog sa 20 metrong lalim na bangin. Dead on the spot ang 15 sakay.

~ ulat mula sa pahayagang Abante Tonite, Pebrero 22, 2024, p.2

kayraming aksidente

ang madalas mangyari

tulad  ng ulat, may trak

na sa bangin bumagsak

kayraming napahamak

at namatay sa sindak

biglaan ang disgrasya

biktima'y labinglima

ang dahilan ba'y ano

nawalan daw ng preno

nang sa pagliko nito

sa bangin dumiretso

sinong dapat managot

sa nangyaring hilakbot

sino bang masisisi

sa ganyang pangyayari

kaytinding aksidente

nakikiramay kami

- gregoriovbituinjr.

02.24.2024

Ang mga aklat ni Balagtas

ANG MGA AKLAT NI BALAGTAS

Maikling sanaysay at tula ni Gregorio V. Bituin Jr.

May apat akong aklat hinggil sa dalawang akda ni Francisco Balagtas. Tatlong magkakaibang aklat hinggil sa Florante at Laura, at isang aklat hinggil sa Orozman at Zafira.

Ang aklat na "Ang Pinaikling Bersyon: Florante at Laura" ay mula kina Gladys E. Jimena at Leslie S. Navarro. Inilathala iyon noong 2017 ng Blazing Stars Publication, na binubuo ng 144 pahina, 18 ang naka-Roman numeral at 126 ang naka-Hindu Arabic numeral. May sukat ang aklat na 5 and 1/4 inches pahalang at 7 and 3/4 inches pababa.

Ang aklat na "Mga Gabay sa Pag-aaral ng Florante at Laura" naman ay mula kay Mario "Guese" Tungol. May sukat na 5 and 1/4 inches pahalang at 8 and 1/4 inches pababa, inilathala iyon noong 1993 ng Merriam Webster Bookstore, Inc., at naglalaman ng 152 pahina. 

Ang dalawang nabanggit na aklat ay pawang nabili ko sa Pandayan Bookshop sa loob ng Puregold Cubao. Ang una ay nagkakahalaga ng P47.00 habang ang ikalawa naman ay P74.00

Ang ikatlo kong aklat hinggil sa "Florante at Laura" ay mula kay national artist for literature Virgilio S. Almario. May sukat na 5 and 3/4 inches pahalang at 8 and 3/4 inches pababa, ikasiyam na limbag na iyon ng ikatlong edisyon at inilathala noong 2023 ng Adarna House, at binubuo ng 154 pahina. Nabili ko iyon sa Fully Booked sa Gateway, Cubao, sa halagang P199.00.

Ang ikaapat naman ay ang Orozman at Zafira, na ang editor din ay si pambansang alagad ng sining para sa panitikan na si Virgilio S. Almario. May sukat iyong 8 and 1/2 inches pahalang at 11 inches pababa. Inilathala iyon noong taon 2020 ng Komisyon sa Wikang Filipino (KWF) sa tulong ng Pambansang Komisyon para sa mga Kultura at mga Sining (NCCA), at may 314 pahina. Nabili ko ang nasabing aklat sa Solidaridad Bookshop noong Hunyo 3, 2021 sa halagang P400.00.

Ang Florante at Laura ay binubuo ng 399 saknong, na ang bawat saknong ay may apat na taludtod, habang ang Kay Celia naman na pinag-alayan ng Florante ay may 22 saknong, at Sa Babasa Nito ay may 6 na saknong, ang kabuuan nito ay 427 saknong. Ibig sabihin, 427 saknong times 4 taludtod bawat saknong equals 1,708 saknong ang bumubuo sa buong Florante at Laura. Habang ang isa pang akda ni Balagtas, ang Orozman at Zafira, ay may kabuuang 9,034 na taludtod.

Samakatuwid, 9,034 divided by 1,708 equals 5.29543, o limang ulit na mas malaki at mas mahaba ang Orozman at Zafira kaysa Florante at Laura. Kaya malaking bagay na napabilang ito sa aking aklatan.

Naaalala ko, nasa ikalawang taon ako sa hayskul nang binasa ko bilang bahagi ng aralin ang Florante at Laura. Marahil ay may batas na nagsasabing dapat pag-aralan ng mag-aaral ang Florante at Laura sa ikalawang taon sa hayskul, habang sa unang taon ay Ibong Adarna, at sa ikatlo ay Noli Me Tangere at sa ikaapat na taon, bago gumradweyt sa hayskul, ay El Filibusterismo.

Subalit nasaliksik ko na may batas na dapat aralin ang Noli at Fili, sa pamamagitan ng Batas Republika 1425 o yaong tinatawag na Rizal Law. Hinanap ko naman kung anong batas na nagsasabing pag-aralan ang Florante at Laura, subalit di ko mahanap.

Ang meron ay Proclamation No. 373, s. 1968 na itinalaga ang Abril 2, 1968 bilang "Francisco Balagtas Day" na nilagdaan ng matandang Marcos, habang nilagdaan naman ni dating pangulong Cory Aquino ang Proclamation No. 274 na nagtatalaga sa taon 1988 bilang Balagtas Bicentennial Year. Sa proklamasyong ito ay nabanggit naman ang Florante at Laura:

Purpose of the Proclamation

Recognizes the need to foster and propagate Balagtas' nationalistic fervor

Balagtas' literary works, such as "Florante at Laura," express nationalistic sentiments

Aims to support and promote activities related to the bicentennial celebration of Balagtas' birth anniversary

Subalit hindi pa rin natin matagpuan ang batas na nagsasabing dapat pag-aralan sa hayskul ang Florante at Laura. Gayunpaman, alam kong mayroon nito, na hindi lang natin sa ngayon matagpuan.

Maganda ring nasaliksik na ang isa pang akda ni Francisco Balagtas - ang Orozman at Zafira. At marahil kung hindi nagkasunog sa bahay nina Balagtas noon, ay maaaring buhay pa at muling inilathala ang iba pa niyang akda. Mabuti't natagpuan ang Orozman at Zafira.

Kumatha ako ng munting tula hinggil sa mga ito.

MAHAHALAGANG AKDA NI BALAGTAS

hayskul ako nang inaral / ang Florante at Laura

may-asawa nang mabili / ang Orozman at Zafira

mga akda ni Balagtas / na napakahahalaga

mga gintong kaisipan / ang sa atin ay pamana

bagamat sa ngayon, ito'y / nabibigyan pa bang pansin?

na inaaral sa hayskul / upang makapasa lang din

subalit kahit paano, / ito'y nababasa pa rin

pagkat sa eskwela'y atas / na akdang ito'y basahin

dahil sa ako'y makata / at mahilig sa pagtulâ

kaya mga akdang ito'y / iniingatan kong sadyâ

para sa mga susunod / na salinlahi't ng bansâ

ay maipagmalaki pa / ang kay Balagtas na kathâ

malalim na pang-unawa, / nag-iba man ang panahon

ay pahalagahan pa rin / ang akda, na isang hamon

sa inyo, sa ating lahat, / at sunod pang henerasyon

mamamatay ako, tayo, / ngunit di ang akdang iyon

02.23.2024

Pag-awit ng Manggagawa

PAG-AWIT NG MANGGAGAWA

naroon sa entablado ang Teatro Pabrika

at ang Teatro Proletaryo, sabay kumakanta

ng awitin sa Manggagawa, kahali-halina

sadyang tagos sa puso't diwa ang inawit nila

nagsiawit sila habang nasa kalagitnaan

ng Labor Forum on ChaCha, mahabang talakayan

hinggil sa nagbabagang isyu sa ating lipunan

sasayaw ba tayo sa ChaCha at sa papirmahan?

patuloy kong dininig ang awit na Manggagawa

sa kasalukuyang rehimen ba'y anong napala?

bakit ibubuyangyang sa dayo ang ating bansa

na siyang nais ng mga kongresista't kuhila?

tila ba ako'y hinehele sa kanilang awit

tinig nila'y may lungkot subalit nakakaakit

prinsipyo't paninindigan sa awit nila'y bitbit

"Mabuhay ang manggagawa!" ang tangi kong nasambit

- gregoriovbituinjr.

02.23.2024

* binidyo ng makata habang sila'y umaawit sa UP nang ilunsad ang Labor Forum on ChaCha, Pebrero 22, 2024

* mapapanood ang bidyo sa kawing na:  https://fb.watch/qo4KiowwaT/

Estudyanteng buntis, sinaksak ng nobyo

ESTUDYANTENG BUNTIS, SINAKSAK NG NOBYO

"Dahil sa hindi umano pagpayag na ipalaglag ang sanggol sa kanyang sinapupunan ay walang awang inatado ng saksak ang 18-anyos na senior high school student na tatlong buwang buntis ng kanyang nobyo, naganap sa Barangay Maahas, Los Baños, Laguna." ~ unang talata sa balitang "Estudyante na buntis, sinaksak ng nobyo, headline sa pahayagang Pang-Masa, Pebrero 23, 2024, pahina 1 at 2

saanmang gubat ay may ahas

pati sa Barangay Maahas

kahindik-hindik na balita

na talagang nakabibigla

karahasan ang nanariwa

sa nobyong nababaliw yata

sinaksak ang kanyang katipan

estudyanteng buntis pa naman

nais na bata'y ipalaglag

ngunit dalaga'y di pumayag

nobyo'y di na nagdalang habag

nang marinig ang pinahayag

biglang sinaksak ang dalaga

pag-ibig na naging trahedya

buti't may mga sumaklolo

sa dilag nang siya'y tumakbo

hustisya nawa'y kamtin nito

at madakip na ang demonyo

- gregoriovbituinjr.

02.23.2024

Di tahimik ang aming panulat

DI TAHIMIK ANG AMING PANULAT

minsan, maraming bagay ang di nabibigkas

marahil dahil nagbabanta'y pandarahas

nagiging walang imik, agad umiiwas

nang di mapaso sa nguso't halik ni hudas

kaya marahil dinadaan sa panitik

upang maipakitang tayo'y umiimik

sa maraming isyung sa bayan dumidikdik

ipahayag ding di tayo nananahimik

prinsipyo't tindig ay tinatanganang buô

at di kami mananatiling walang kibô

kahit pasista pa ang sa amin sumundô

pagtortyur man o pagpaslang ang maging lundô

magpapatuloy kami sa panunuligsâ

sa mga tiwali, gahaman, tusong gawâ

narito kaming mag-uulat at tutulâ

bakasakaling hustisya'y kamtin ng dukhâ

- gregoriovbituinjr.

02.23.2024

Di pa napapanahon ang ChaCha

DI PA NAPAPANAHON ANG CHACHA

nagtatago sa ngalang People's Initiative
na pinapipirma kahit ang nasa liblib
ginagamit ang masa sa ambisyong tigib
ang totoo, iyan ay Trapo Initiative

ano bang nais baguhin sa Konstitusyon?
o gaya ng dati, nais ay term extension?
gagalawin daw ang economic provision
upang sa dayuhan buksan ang bansa ngayon

kayrami nang iskwater sa sariling lupa
ay gagawin pang sandaang poryentong sadya
ang pag-aari ng dayo sa ating bansa
sandaang porsyentong iskwater malilikha

subalit bakit nagsimula nito'y trapo
kongresista, meyor, ang nanguna umano
pumirma ka, pagkat may ayuda raw ito
tila baga sila'y bumibili ng boto

aba'y inuuto ang masang maralita
na sa lipunan ay nakararaming sadya
walang papel dito ang dukha't manggagawa
at di rin ito inisyatibo ng madla

kaya dapat lang tutulan ang ChaCha ngayon
di pa marapat baguhin ang Konstitusyon
pagkat ang ChaCha ay di pa napapanahon
mabuti kung ito'y bunga ng rebolusyon

wawakasan ang elitistang paghahari
at ugat ng hirap - pribadong pag-aari
itatayo natin yaong lipunang mithi
na makikinabang ay bayan, uri't lahi

lilikhain dito'y bagong Saligang Batas
na uring manggagawa ang dito'y kukumpas
habang tinatayo'y isang lipunang patas
na palakad sa tao'y sistemang parehas

isang Konstitusyong likha ng sambayanan
di ng mayayaman, elitista't gahaman
ipapamahagi ang yaman ng lipunan
ng pantay, walang mahirap, walang mayaman

- gregoriovbituinjr.
02.22.2024

* Kinatha at binigkas ng makata bilang reaktor sa FDC Forum on ChaCha sa umaga, at sa Labor Forum on ChaCha sa hapon ng Pebrero 22, 2024.

Boksingerong anak ni Pacquiao ang isabak sa Paris Oympics

BOKSINGERONG ANAK NI PACQUIAO ANG ISABAK SA PARIS OLYMPICS

Maikling sanaysay at tula ni Gregorio V. Bituin Jr.

Overage na si Manny Pacquiao kaya hindi inaprubahan ng International Olympic Committee (IOC) ang kahilingan ng Philippine Olympic Committee (POC) na makuha ang awtomatikong tiket ni Pacquaio upang makalahok sa 2024 Paris Olympic Games sa Paris, sa bansang Pransya. Nasa edad 45 na si Pacquiao habang hanggang 40 anyos ang age limit ng lahat ng boksingerong lalahok sa Olympic Games.

Ikalawa, kailangan din ni Pacquiao na sumalang sa qualifying tournament upang makapasok sa Olympics. Ito'y ayon sa mga balita sa iba't ibang dyaryo at social media.

Matapos makuha ni Hidilyn Diaz ang unang gold medal ng Pilipinas sa 2020 Olympic Games, marahil ay saka naisip ni Pacquiao na sumali at katawanin ang Pilipinas sa Olympics. Dahil kung pangarap talaga niya ito, aba'y noong bago pa niya kalabanin si Ledwaba, o noong talunin niya si Barrera ay dapat naisip at pumasok na siya sa boxing team ng Pilipinas sa Olympics. Subalit hindi.

Na-inspire lang marahil talaga siya dahil nakakuha ng dalawang Olympic medals si Diaz, silver medal noong 2016 Rio Olympic at gold medal sa 2020 Tokyo Olympics. Subalit hindi naman masamang magmungkahi kung nais ni Pacquiao na matupad ang kanyang pangarap na makakuha ng medalya sa Olympics.

Ihabol niya ang boksingero niyang anak na si Jimwel na nagboboksing na rin upang sumabak sa Olympic Games. Iyan ang pinakamagandang mungkahi na maaari niyang gawin.

Kumbinsihin ni Pacquiao ang boksingero ring anak niyang si Jimuel na lumaban sa Paris Olympics. Ang kanyang anak ang siyang tutupad sa pangarap ng ama na manalo ng medalya sa Olympics. Ano pa ang hinihintay natin?

Kumatha ako ng munting tula hinggil dito:

JIMUEL PACQUIAO ANG ILABAN SA OLYMPIC GAMES

sa Olympic Games ay di na kwalipikado

si Manny Pacquiao, ngunit may alternatibo

ang kanyang anak na isa ring boksingero

ay kumbinsihing "Mag-Olympics ka na, iho"

may ulat pang kampyong si Canelo Alvarez

ang kanyang tagapagsanay kaya mabilis

umunlad sa boksing, tila walang kaparis

sa amatyur man ay nagpakita ng bangis

kaya Manny, si Jimuel, panganay mong anak

sa Paris Olympics Games ay iyong isabak

bagong landas iyon na kanyang matatahak

at sa gabay mo'y di siya mapapahamak

nandyan si Jimuel, bansa'y di na maghahanap

siya ang katuparan ng iyong pangarap

basta sa pagsasanay, siya'y magsisikap

balang araw, gold medal ay kakamting ganap

02.21.2024

Pinaghalawan ng datos:

Balita sa pahayagang Pang-Masa (PM), Pebrero 19, 2024

https://www.pna.gov.ph/articles/1219066

https://nypost.com/2024/02/19/sports/boxing-legend-manny-pacquiao-denied-exemption-to-participate-in-2024-summer-olympics/

https://www.rappler.com/sports/boxing/jimuel-pacquiao-trains-with-canelo-alvarez/

https://push.abs-cbn.com/2023/2/5/jimuel-pacquiao-wins-his-7th-amateur-boxing-fight-in-the-us-1106

https://boxrec.com/forum/viewtopic.php?t=254807

Si dating Sen. De Lima sa World Day of Social Justice

SI DATING SEN. LEILA DE LIMA SA WORLD DAY OF SOCIAL JUSTICE

Maikling sanaysay at tula ni Gregorio V. Bituin Jr.

Isa ako sa mga dumalo sa The Adrian E. Cristobal Lecture Series 2024 sa Gimenez Gallery, UP Diliman, Pebrero 20, 2024, araw ng Martes, sa ganap na ikatlo hanggang ikalima ng hapon. Ang panauhing tagapagsalita ay si dating Senadora Leila Mahistrado De Lima.

Dumalo ako dahil palagay ko'y itinaon ang nasabing pagtitipon sa Pebrero 20 dahil iyon mismo ay UN-declared World Day of Social Justice. Nang una kong mabatid ang nabanggit na araw ay talagang itinaguyod ko na ito.

Nakasalubong ko ang araw na ito habang nagsasaliksik ng araw na inideklara ng United Nations para sa pahayagang Taliba ng Maralita, ang opisyal na publikasyon ng pambansang samahang Kongreso ng Pagkakaisa ng Maralitang Lungsod (KPML), kung saan naglabas noon ng pahayag ang KPML hinggil sa World Day of Social Justice.

Kaya dinaluhan ko ang panayam kay De Lima. Naisip kong sadyang itinapat ang panayam sa Pebrero 20, dahil nga World Day of Social Justice. Ikalawa pa lang ng hapon ay naroon na ako sa Gimenez Gallery. Ikatlo ng hapon ay nagsimula na ang palatuntunan sa pamamagitan ng Lupang Hinirang. Sunod ay Opening Remarks ni Gng. Susan S. Lara, Ikalawang Pangulo ng UMPIL o Unyon ng mga Manunulat sa Pilipinas. Sinundan ito ng Welcome Remarks ni Propesor Jimmuel C. Naval, Dean ng College of Arts and Letters ng UP Diliman, at isa sa aking guro sa Palihang Rogelio Sicat Batch 15.

Ang nagsalita naman hinggil sa kasaysayan at layunin ng The Adrian Cristobal Lecture Series, na nagsimula pa noong 2010, ay si Ms. Celina S. Cristobal, kinatawan ng Cristobal Family Foundation, at dating board member ng UMPIL.

Sunod ay ipinakilala at tinawag ni Ms. Jazmin B. Llana ang panauhing tagapagsalita na si dating Senadora Leila De Lima. Ang pamagat ng lektura ni De Lima ay "Gender and Political Oppression", kung saan nagtala ako ng ilan sa kanyang mga ipinahayag sa aking munting kwaderno.

Sa open forum ay una akong nagtaas ng kamay at tinawag agad ako ng moderator na si Clarissa Militante. Sabi ko, "Kanina ay nabanggit po ni Mam Celina Cristobal na kaya Pebrero 20 itinaon ang lektura ay dahil ang petsang ito ang kaarawan ng namayapang awtor na si Adrian E. Cristobal. Akala ko po ay dahil itinaon ang lektura ninyo dahil ngayon ay UN-declared World Day of Social Justice". Sabi naman ni De Lima, "Isa rin sa aking advocacy ang social justice. Salamat sa paalala."

Bagamat walang isa sa nagsabi na ang araw na iyon ay World Day of Social Justice ay nabanggit natin na mayroong ganitong araw.

Nang una kong mabatid ang World Day of Social Justice ay kinulit ko na ang ilang mga kasama sa IDefend, isang human rights platform na maraming kasaping organisasyon. Dahil sa aking pangungulit noong 2019 ay naglunsad ang IDefend ng aktibidad hinggil sa usaping ito. Kaya isang malaking karangalan na napansin ang araw na ito.

Subalit hindi ito kasintindi ng pagkilala sa International Human Rights Day tuwing Disyembre 10. Bagamat magkaugnay ang Human Rights at Social Justice, na ang katibayan ay matatagpuan natin sa ating Konstitusyon ng 1987 kung saan ang pamagat ng Artikulo 13 ay "Social Justice and Human Rights."

Sana'y maging ganap at popular ang pagkilala ng mamamayan sa World Day of Social Justice, tulad ng kung paano kinikilala ng mga human rights organizations, civil society, people's organizations, government agencies, at iba pang grupo, ang International Human Rights Day. Hinggil sa paksang ito, mangyaring tingnan at basahin ang kasaysayan ng araw na ito sa kawing na https://www.un.org/en/observances/social-justice-day kung saan pinangunahan ang pagpapatibay nito ng samahang paggawa na International Labour Organization (ILO).

Isa nga sa ginawa kong disenyo ng plakard sa araw na iyon ay may litrato ng kandila sa gitna, at sa itaas ay nakasulat: "February 20 is World Day of Social Justice" at sa ibaba nito ay "Katarungan sa lahat ng biktima ng EJK!" Pinadala ko ito sa messenger ng isang ina ng EJK victim, at ang kanyang sabi, "Salamat sa pakikiramay."

Tinapos naman ni G. Michael M. Coroza, pangulo ng UMPIL, ang palatuntunan sa pamamagitan ng pagbigkas ng tulang pinamagatang "Mapagpalang Daigdig". Matapos iyon ay nagkodakan na, sa gitna ang panauhing tagapagsalita, kasama si National Artist Virgilio Almario.

Matapos ang panayam ay saglit din kaming nagkausap nina Dean Jimmwel Naval at Propesor Joey Baquiran. May pameryenda rin. at bago umalis ay bumili ako ng librong "The Adrian E. Cristobal Lecture Series 2010-2017". Lampas na ng ikalima ng hapon nang ako'y umalis.

Ginawan ko ng tula ang karanasang ito.

LEILA DE LIMA AT ANG USAPING SOCIAL JUSTICE

halina't itaguyod ang World Day of Social Justice

bukod sa karapatan, tao'y di dapat just-tiis

pag-abuso sa karapatan ay dapat mapalis

hustisyang asam ng masa nawa'y kamting mabilis

Social Justice ay itaguyod saanmang arena

kaya sa A. Cristobal Lecture Series ay nagpunta

nag-aakalang mabanggit ni dating senadora

De Lima ang araw na itong napakahalaga

sa paksa niyang "Gender and Political Oppression"

ay isiniwalat ang danas sa pagkakakulong

anong nasa puso't diwa higit anim na taon

ng pagkapiit, anong mga dumating na tulong

nagpapasalamat ako't doon ay nakadalo

at ang araw na nabanggit ay naisiwalat ko

na sana'y tumimo talaga sa isip ng tao

na araw na ito'y dapat ding kilanling totoo

02.21.2024

Alikabok

ALIKABOK

kailangang kilusang masa'y palakasin

nang nawalang tinig ng api ay bawiin

ang alikabok man kung aalalahanin

sa mata ng naghahari'y makapupuwing

kaya magpatuloy tayong mag-organisa

upang mamulat sa mga isyu ang masa

upang sila'y magalit sa trapo't burgesya

upang mapalitan ang bulok na sistema

ang mahihirap ay tinuring na basahan

parang alikabok na aapak-apakan

dapat bawiin ang puri o karangalan

na sa kanila'y inagaw nitong gahaman

bakit ba dukha'y tinuring na alikabok?

sabi sa awit na dapat nating matarok

tayo'y kumilos, baligtarin ang tatsulok

at silang dukha ang ilagay mo sa tuktok

- gregoriovbituinjr.

02.20.2024

Nilay

NILAY

naritong nakatitig sa ulap

pagkat buhay ay aandap-andap

nais sumakay sa alapaap

nang tunguhin ang pinapangarap

nakatunganga muli sa notbuk

upang kathain ang ilalahok

sa patimpalak, isang pagsubok

kung makakarating ba sa tuktok

nakasulyap pa rin sa kawalan

walang malirip sa katagalan

ginawa'y nagpahinga na lamang

at nakatulog sa kalaunan

ganito minsan pag nagmumuni

minsan, nakatingin sa kisame

pinagninilayan ang diskarte

upang kwento't tula'y mapabuti

- gregoriovbituinjr.

02.20.2024

P60 na ang kilo ng bigas

P60 NA ANG KILO NG BIGAS

kilo ng bigas ay sisenta na

ay, ganyan na kamahal ang benta

bente pesos ay one third kilo na

ang pangako'y napako talaga

anong nangyari, bakit ganito

sa ilalim ng kapitalismo

tingin ng magsasaka ba'y ano?

anong pananaw ng masa rito?

nagpunta nga ako sa bigasan

sa kalapit naming pamilihan

doon ay nagpalitrato naman

nang presyo nito'y may katibayan

kaymahal na ng bigas sa atin

pambili rito'y saan kukunin

salapi sa bulsa'y titipirin

kaya tipid na rin sa pagkain

- gregoriovbituinjr.

02.19.2024

Ako'y aktibista, may dugong bayani

AKO'Y AKTIBISTA, MAY DUGONG BAYANI

ako'y aktibista, / may dugong bayani

lahing Bonifacio, / Rizal, at Mabini

diwang Che at Lenin / idolong matindi

na sadyang sa uri't / bayan nagsisilbi

di lang lumalaban / sa tusong dayuhan

kundi mapang-api, / burgesyang gahaman,

sa kapitalistang / kunwa'y makabayan,

at sa naghaharing / buwayang iilan

nais ko'y lipunang / sadyang makatao

nais na hustisya'y / makamtang totoo

nais na pawiin / pag-aring pribado

ibahaging pantay / ang yaman ng mundo

ako'y aktibista, / hindi makabayan

na internasyunal / ang paninindigan

pag may api kahit / hindi kababayan

ay kauri silang / dapat ipaglaban

naririto pa rin, / wala mang salapi

sa rali't pagkilos / ay mananatili

sadyang naglilingkod / sa masa't kauri

aming ibabagsak, / uring naghahari

ako'y aktibista, / puso'y pandaigdig

uring manggagawa / ang kakapitbisig

sa internasyunal, / api'y kapanalig

sa mapambusabos / ay di palulupig

- gregoriovbituinjr.

02.19.2024

Tahong at tutong

TAHONG AT TUTONG

tarang kumain, ulam ko'y tahong

kanin man ay bahaw, pulos tutong

pag-uwi'y ito ang sumalubong

katalo na rin laban sa gutom

paunti-unti nating tanggalin

ang talukab at laman ay kunin

isama sa tutong at sakulin

ang sabaw pa'y kaysarap higupin

sa saliw ng "tahong and winding road"

buti'y may tahong kaysa tumanghod

kung sa balot lalakas ang tuhod

sa tahong titibay ang gulugod

tarang kumain, aking katoto

at tahong ay namnaming totoo

kaysarap ng ating salusalo

magsakol man o magkamay tayo

- gregoriovbituinjr.

02.19.2024

Madalas madulas

MADALAS MADULAS

madalas pa ring nagninilay

madulas pa ring nagsisikhay

bagamat madalas malumbay

sa masa'y madulas ang ugnay

madalas din akong madulas

sa banyo matapos maghugas

o maligo hanggang lumabas

mag-ingat na'y aking nawatas

madalas akong kumakatha

madulas ang pananalita

at madalas ding tumutula

kahit di madulas ang paksa

madalas sa rali't pagkilos

buti't madulas, parang palos

nilabana'y pambubusabos

kasangga ang mga hikahos

- gregoriovbituinjr.

02.19.2024

Pinagputol na puno

PINAGPUTOL NA PUNO

nadaanan ko'y punong pinutol

sa kalsada, sino ang humatol

upang puno'y tuluyang malipol

ang sambayanan ba'y di tumutol

mga nalikha'y mumunting troso

ng sinumang hinusgahan ito

ang mga puno raw ay perwisyo

kaya raw dapat putling totoo

ah, kailan pa naging balakid

ang mga puno nating kapatid

na tila sa dilim ibinulid

ng palalong perwisyo ang hatid

di sagabal sa kapaligiran

yaong tumubo sa kalikasan

na nauna pa sa sambayanan

puno'y dapat lamang protektahan

- gregoriovbituinjr.

02.18.2024

Paano

PAANO

paano itatanim ang binhi

upang maabot ang minimithi

paano mawala ang pighati

na dahilan ng pagkakahati

paano ilalagay sa kamay

hindi ang batas, kundi ang pakay

paano mapatatag ang hanay

at kamtin ang asam na tagumpay

paano isusulat ang paksâ

hinggil sa manggagawa't dalitâ

paano natin dapat ikathâ

ang mga sanaysay, kwento't tulâ

paano ba ang estratehiya

sa buo, paano ang taktika

sitwasyon ba'y nasuri't nabasa

nang magwagi sa pakikibaka

- gregoriovbituinjr.

02.17.2024

Upang

UPANG

ano bang aking gagawin o iisipin

upang mapagtanto ang misyon ko't layunin

upang ang bawat pakikibaka'y asamin

upang mga isyu ng bayan ay dibdibin

upang mga buktot at tiwali'y lipulin

upang planong nobela'y talagang makatha

upang akdain ang naisip na pabula

upang malinang ang kaalaman sa tula

upang maisatitik ang balak na dula

upang sumulat ng dagli't kwentong pambata

upang makapagpatuloy sa nilalandas

upang mapigilan ang mga talipandas

upang makaiwas sa mga tuso't hudas

upang batas ay mapatupad ng parehas

upang makapagtatag ng lipunang patas

- gregoriovbituinjr.

02.16.2024

Nagigising ng madaling araw

NAGIGISING NG MADALING ARAW

nagigising ng madaling araw

ako nga'y naaalimpungatan

pagkat may paksang biglang lilitaw

na punong-puno ng katanungan

maralita ba'y kaawa-awa

pinagsasamantalahan lagi

ito'y lipunan ng manggagawa

subalit kaapiha'y masidhi

binubuhay nila ang lipunan

binubundat ang kapitalista

ang ganito ba'y makatarungan?

ah, bakit ba bulok ang sistema?

kayraming paksa pag nahihimbing

sa akin animo'y nanggigising

- gregoriovbituinjr.

02.16.2024

Happy civil wedding anniv, mahal ko

HAPPY CIVIL WEDDING ANNIV, MAHAL KO

oo, kinasal kami ng Araw ng mga Puso

kasabay ng limampu't walo pang magkasintahan

binasbasan ng alkalde, Araw ng mga Nguso

pagkat naghalikan sa nasabing kasalang bayan

happy wedding anniversary, mahal kong diwata

patuloy ang pagsinta ng irog mong mandirigma

patuloy man akong lingkod ng uring manggagawa

at sekretaryo heneral ng samahang dalita

di ako magpapabaya sa tahanan, O, irog

guminhawa man ang buhay o umaalog-alog

magsisikap tayo upang marating ang tugatog

ng tagumpay kahit ang araw natin ay lumubog

muli, Happy Civil Wedding Anniversary, mahal

bagamat pangunahing bilihin ay nagmamahal

- gregoriovbituinjr.

02.14.2024